故鄉的異鄉人：武雄《夜官巡場》推薦序
時代的跤步閣較緊，有真濟代誌的變化，是有夠慢的慢，甚至其中的改變，是感覺袂出來的，就親像佇血脈內底的DNA，每一個人對土地、對故鄉、對親情，各種的情懷，各種的牽挽，各種的感慨，經過幾代人，猶原相𫝛siāng，人類，並無因為時代的進步變較精光。
故鄉的異鄉人 ／武雄
原仔是愛對音樂來講起。
知影張嘉祥這個名，是對裝咖人樂團開始，因為流行音樂工作上的需要，我對箍仔內出現的新人蓋注意，尤其台語歌壇，若有少年輩出現，我攏會加減去了解，希望家己綴會著時代的跤步。
名真好記，佮我寫空笑夢的老戰友吳嘉祥是偶giô的，團名裝咖人閣較心適，以演藝界來講，毋管有紅無紅，無論大牌細牌，徛踮台頂攏是跤kha，會當予大家熟似，除了才情，嘛攏愛靠各種企劃包裝，才有法度一點一滴粒積知名度，慢慢當變做金光沖沖滾，衝甲掠袂牢的大明星，結果這幾個少年兄用現代的文字，講家己是「裝」出來的「咖」，有一點仔謙虛嘛有一點仔古錐，若是共字讀出聲，裝咖人庄跤人，又閣變做樸實帶淡薄仔塗味的田庄兄哥，真有現代少年家的想法佮創意，予我印象真深。
見面相認又閣是另外一個故事，有一工師大台文系呂美親教授欲來厝裡採訪，做陣來的是伊三個學生，包括讀博士班的老朋友董事長樂團吉董，介紹到嘉祥的時，伊就提出一塊伊的簽名專輯送我，算來嘛是一齣數位音樂時代，「唱片敢若名片」的見證。
聽嘉祥的歌佮讀伊的冊有真濟無仝的感覺，雖然所講的故事，攏是用伊出世的嘉義火燒庄做背景，文章內底伊將自細漢到這馬，對家庭，對土地，對家己種種的思考佮探討，講了閣較詳細，我才發現，這個少年仔，並毋是我歌中聽到的，佇見面的時看到的彼呢茈tsínn，嘛發現伊個性內底有一寡叛逆性，成長的過程中，較鬱卒，較黯淡的心情，攏是我聽歌的時陣無去注意到的。
這引起我真大的興趣，裝咖人的音樂結合真濟傳統的戲曲，自細漢我所了解的，有鼓吹八音南北管出現的場所，若毋是過年過節的喜慶，無就是嚴肅悲傷的場面，佇一直偏向對⻄方音樂取經的流行歌壇，見擺聽到熟似的傳統音色攏予我感覺特別親切，可能是這種心情，歌中彼個少年家所發出來的，佇伊成長過程中，種種不安的信號，煞攏因為我歡喜的心情煞來失覺察。
以年歲來講，我算是嘉祥頂一代人，我的故鄉徛佇隔壁雲林，真濟我細漢的時陣，厝邊隔壁風聲嗙phngh影的代誌，真真假假的魔神仔傳說，隨著當年序大人出外討趁流浪到台北了後，漸漸拍交落已經袂記了了，嘉祥的故事，予我想起真濟遙遠的記持，故事內底伊的故鄉，慢慢佮我的故鄉相重疊，伊冊內所寫的，「故鄉的異鄉人」彼款心情，煞予我佮伊有「異鄉的故鄉人」的同感，這是一種毋知欲按怎形容的親切感。
原來，時代的跤步閣較緊，有真濟代誌的變化，是有夠慢的慢，甚至其中的改變，是感覺袂出來的，就親像佇血脈內底的DNA，每一個人對土地、對故鄉、對親情，各種的情懷，各種的牽挽，各種的感慨，經過幾代人，猶原相𫝛siāng，人類，並無因為時代的進步變較精光。
城市生活就親像鼓吹八音，將日子鬧熱化喜慶化，小可無細膩，心肝內另外一爿面，八音所服務的另外一個世界，對天地對鬼神的敬畏，對人對土地的疼惜，恐驚嘛漸漸咧消失。
建議大家那看冊的時，會當那放歌來聽，歌是用第一人稱來唱伊的故鄉，冊嘛是用第一人稱來講伊的故鄉，但是佇冊內底感受到閣較濟心情的信號，頂一代男女佇婚姻中的恩怨，序細佇父權家庭中的委屈，包括少年人離鄉出外認同的困境種種，曾經遭遇過的人生，佇有歲了後，毋管有解決的、無解決的，會記得的佮袂記得的，如今一項一項慢慢回想，我相信這是這本冊，欲提醒我思考的代誌。
夜官巡場這張唱片，已經佇業界得到真濟肯定，歌是裝咖人的第一張專輯，冊嘛是嘉祥第一本創作，而且現此時伊還只是大學台文所的學生，另日出業，成就不可限量，真恭喜伊揣到音樂創作這條路，做伊對人生種種思考的出口，也真歡喜伊揣到文學創作的方式，做伊一個嘉義子弟對故鄉感情的表達，我相信音樂會予伊閣較積極樂暢，我也相信文學會增加伊的底蒂內才，我更加相信，裝咖人這字裝，絕對是「讚的去裝的」彼字裝，這是對伊心內寫出來，上真實的感情，也是對咱的土地發出來，上美麗的聲音。
作者簡介 | 張嘉祥
1993年出生。國立東華大學華文文學系畢業，目前就讀台灣師範大學台文所。嘉義民雄人，火燒庄張炳鴻之孫。從事音樂製作及創作、文學創作、Podcast主持等。現為「庄尾文化聲音工作室」負責人、台語獨立樂團「裝咖人Tsng-kha-lâng」團長、Podcast《台灣熱炒店》節目主持人。2021年出版《夜官巡場Iā-Kuan Sûn-Tiûnn》專輯，入圍第33屆金曲獎最佳新人。曾獲文化部110年度青年創作獎勵、文化部110年度扶植青年藝術發展補助計畫補助、文化部110年度語言友善環境及創作應用補助等。
